தமிழ் திரையுலகில் ‘தேனிசைத் தென்றல்’ என ரசிகர்களால் அன்புடன் அழைக்கப்படும் பிரபல இசையமைப்பாளர் தேவா, மாரடைப்பு காரணமாக உயிரிழந்ததாக தகவல் வெளியாகியுள்ளது. அவருக்கு வயது 75.

இன்று காலை தேவாவுக்கு திடீரென மாரடைப்பு ஏற்பட்டதைத் தொடர்ந்து, அவர் உடனடியாக மருத்துவமனையில் அனுமதிக்கப்பட்டதாகக் கூறப்படுகிறது. அங்கு மருத்துவர்கள் தீவிர சிகிச்சை அளித்தும், சிகிச்சை பலனின்றி அவர் உயிரிழந்ததாக தகவல்கள் தெரிவிக்கின்றன.

தமிழ் சினிமாவில் தனி முத்திரை பதித்த தேவா

தமிழ், தெலுங்கு, மலையாளம் உள்ளிட்ட தென்னிந்திய மொழித் திரைப்படங்களில் பணியாற்றிய தேவா, தனது தனித்துவமான இசையால் ஏராளமான ரசிகர்களைக் கவர்ந்தவர்.

பிரசாந்த் நடிப்பில் வெளியான ‘வைகாசி பொறந்தாச்சு’ திரைப்படத்தின் மூலம் இசையமைப்பாளராகப் பிரபலமான தேவா, பின்னர் தமிழ் திரையுலகின் முன்னணி இசையமைப்பாளர்களில் ஒருவராக உயர்ந்தார்.

குறிப்பாக ரஜினிகாந்த் நடித்த ‘அண்ணாமலை’ திரைப்படத்தில் இடம்பெற்ற மாஸான பின்னணி இசை, இன்றளவும் ரசிகர்களால் கொண்டாடப்பட்டு வருகிறது. ரஜினிகாந்தின் திரையுலக அடையாளங்களில் ஒன்றாக மாறிய அந்த இசையை உருவாக்கிய பெருமை தேவாவையே சாரும்.

‘பாட்ஷா’, ‘ஆசை’, ‘காதல் கோட்டை’, ‘குஷி’ உள்ளிட்ட பல வெற்றிப் படங்களுக்கு இசையமைத்து, மெலடி பாடல்கள் முதல் கானா பாடல்கள் வரை அனைத்திலும் தனது திறமையை நிரூபித்தவர்.

அண்மையில் திரைப்பட விழாவில் பங்கேற்பு

அண்மையில் நடைபெற்ற ‘மீசைய முறுக்கு 2’ திரைப்படம் தொடர்பான நிகழ்ச்சி ஒன்றிலும் தேவா கலந்துகொண்டிருந்தார். இந்நிலையில், அவரது திடீர் மறைவு குறித்த தகவல் ரசிகர்கள் மத்தியில் அதிர்ச்சியை ஏற்படுத்தியுள்ளது.

தேவாவின் சகோதரரும் இசையமைப்பாளருமான சபேஷ் கடந்த 2025ஆம் ஆண்டு அக்டோபர் மாதம் உயிரிழந்தார். அந்தச் சோகத்தைத் தொடர்ந்து தற்போது தேவாவின் மறைவு குறித்த தகவலும் வெளியாகியுள்ளது.

இருப்பினும், தேவா உயிரிழந்ததாகக் கூறப்படும் தகவலுக்கு அதிகாரப்பூர்வ உறுதிப்படுத்தல் தேவைப்படுகிறது.