ஆப்கானிஸ்தான் பிரீமியர் லீக் (APL) டி20 தொடரில் பங்கேற்க இங்கிலாந்து வீரர்களுக்கு No-Objection Certificate (NOC) வழங்குவது தொடர்பாக இங்கிலாந்து மற்றும் வேல்ஸ் கிரிக்கெட் வாரியம் (ECB) தனது முந்தைய நிலைப்பாட்டை மறுபரிசீலனை செய்யக்கூடும் என அதன் தலைவர் ரிச்சர்ட் தாம்சன் தெரிவித்துள்ளார்.
முன்னதாக, ஆப்கானிஸ்தான் அரசின் பெண்கள் தொடர்பான கொள்கைகளுக்கு எதிர்ப்பு தெரிவித்து, ஆப்கானிஸ்தானுடன் இருதரப்பு கிரிக்கெட் தொடர்களில் விளையாட மறுத்திருந்தாலும், APL தொடரில் விளையாடும் இங்கிலாந்து வீரர்களுக்கு NOC வழங்க ECB திட்டமிட்டிருந்ததாக தகவல் வெளியானது.
ECB மீது எழுந்த எதிர்ப்பு
இந்த தகவல் வெளியானதை தொடர்ந்து ECB-யின் முடிவுக்கு எதிர்ப்புகள் எழுந்தன. குறிப்பாக, கடந்த ஆண்டு சாம்பியன்ஸ் டிராபியில் ஆப்கானிஸ்தானுக்கு எதிரான போட்டியை இங்கிலாந்து புறக்கணிக்க வேண்டும் என வலியுறுத்திய லேபர் கட்சி நாடாளுமன்ற உறுப்பினர் டோனியா அன்டோனியாசி, APL-ல் இணைவதன் விளைவுகளை வீரர்கள் தீவிரமாக பரிசீலிக்க வேண்டும் என தெரிவித்திருந்தார்.
“மிகவும் கவனமாக பரிசீலிப்போம்” – ECB தலைவர்
லார்ட்ஸில் நடைபெற்ற நிகழ்வொன்றில் பேசிய ECB தலைவர் ரிச்சர்ட் தாம்சன், வீரர்களுக்கு NOC வழங்குவது தொடர்பாக சட்டரீதியான கட்டுப்பாடுகள் இருப்பதாக குறிப்பிட்டார்.
ஒருவர் எங்கு வேலை செய்ய வேண்டும் என்பதை தடுக்க போதுமான காரணம் இருக்க வேண்டும் என்றும், வர்த்தகச் சுதந்திரத்தை கட்டுப்படுத்துவது தொடர்பாக இங்கிலாந்தின் சட்டங்கள் தெளிவாக இருப்பதாகவும் அவர் தெரிவித்தார்.
ஆனால், குறிப்பாக APL தொடர்பாக NOC வழங்குவது குறித்து இன்னும் ECB-க்கு அதிகாரப்பூர்வமாக விவகாரம் வரவில்லை என்றும், அது வந்தபோது “மிகவும் கவனமாக பரிசீலிக்க வேண்டும்” என்றும் தாம்சன் கூறினார்.
APL டிராஃப்டில் இங்கிலாந்து வீரர்கள்
இதற்கிடையில், இந்த மாதம் நடைபெறவிருந்த APL வீரர்கள் டிராஃப்டுக்கான பதிவுகளில் இங்கிலாந்து தகுதி கொண்ட சுமார் 12 வீரர்கள் இடம்பெற்றுள்ளனர்.
கடந்த வாரத்தில் வில் ஸ்மீட், ஜேம்ஸ் ரியூ, ஆசா டிரைப் மற்றும் டேவிட் மலான் உள்ளிட்ட வீரர்களின் பெயர்களும் நீண்ட பட்டியலில் சேர்க்கப்பட்டுள்ளன.
APL வீரர்கள் டிராஃப்ட் முதலில் திட்டமிடப்பட்ட தேதியிலிருந்து ஒத்திவைக்கப்பட்டு, தற்போது அக்டோபர் 24ஆம் தேதி நடைபெற உள்ளது. இந்தத் தொடர் டிசம்பர் 27 முதல் ஜனவரி 16 வரை நடைபெறும் என திட்டமிடப்பட்டுள்ளது.
APL நடைபெறுமா என்பதிலும் சந்தேகம்
எனினும், APL திட்டமிட்டபடி நடைபெறுவதற்கு இன்னும் சில முக்கிய பணிகள் முடிவடைய வேண்டியுள்ளது. இதுவரை ஐந்து அணிகளுக்கான உரிமையாளர்களில் மூன்று பேர் மட்டுமே அதிகாரப்பூர்வமாக அறிவிக்கப்பட்டுள்ளனர்.
மீதமுள்ள இரண்டு அணிகளுக்கான உரிமையாளர்களை கண்டறியும் செயல்முறை எதிர்பார்த்ததைவிட அதிக காலம் எடுத்துள்ளதாகவும் தகவல்கள் தெரிவிக்கின்றன.
இதனால், ஒருபுறம் இங்கிலாந்து வீரர்களுக்கு NOC வழங்குவது தொடர்பாக ECB தனது நிலைப்பாட்டை மறுபரிசீலனை செய்யும் சூழல் உருவாகியுள்ள நிலையில், மறுபுறம் APL தொடர் திட்டமிட்டபடி நடைபெறுமா என்பதிலும் கேள்விகள் எழுந்துள்ளன.












Comments (0)
Be the first to share your thoughts.