இந்திய மகளிர் கிரிக்கெட் அணியின் புதிய முழுநேர கேப்டனாக நியமிக்கப்பட்டுள்ள ஸ்மிருதி மந்தனா, தனது தலைமைத்துவத் திறமையை ஏற்கெனவே பலமுறை நிரூபித்துள்ளார். குறிப்பாக, மகளிர் பிரீமியர் லீக் (WPL) தொடரில் ராயல் சேலஞ்சர்ஸ் பெங்களூரு அணியின் கேப்டனாக மூன்று சீசன்களில் இரண்டு முறை சம்பியன் பட்டத்தை வென்றது, அவரது தலைமைத்துவத்தின் மீது அதிக நம்பிக்கையை ஏற்படுத்தியுள்ளது.
மறுபுறம், இந்திய அணி 2024 மற்றும் 2026 ஆம் ஆண்டுகளில் நடைபெற்ற மகளிர் T20 உலகக் கிண்ணத் தொடர்களில் குழுநிலையைத் தாண்டத் தவறியிருந்தது. இந்தப் பின்னணியில், அணியை அடுத்த கட்டத்திற்கு அழைத்துச் செல்லக்கூடிய தலைவராக மந்தனாவுக்கு வாய்ப்பளிக்கப்பட்டுள்ளது.
முழுநேர இந்திய அணித் தலைவியாக அவர் எதிர்கொள்ளும் முதல் சவாலாக, ஜிம்பாப்வே மகளிர் அணிக்கு எதிரான சொந்த மண்ணிலான மட்டுப்படுத்தப்பட்ட ஓவர்கள் தொடர் அமையவுள்ளது. முன்னாள் கேப்டன் ஹர்மன்ப்ரீத் கவுரைப் போல அதிரடியாகச் செயல்படுவாரா? இளம் வீராங்கனைகளுக்கு எவ்வாறு வாய்ப்பளிப்பார்? அவரது தலைமைத்துவப் பொறுப்புகள் துடுப்பாட்டத்தில் தாக்கத்தை ஏற்படுத்துமா? எனப் பல கேள்விகள் எழுந்துள்ளன.
WPL தொடரில் மந்தனாவின் தலைமைத்துவம்!
2026 ஆம் ஆண்டு WPL தொடருக்கு முன்னதாக, எலிஸ் பெர்ரி அணியில் விளையாட முடியாத நிலை ஏற்பட்டபோது, அவருக்குப் பதிலாக மற்றொரு வெளிநாட்டு சகலதுறை வீராங்கனையைத் தேர்வு செய்வதே பொதுவான எதிர்பார்ப்பாக இருந்தது.
ஆனால், ஏலத்தில் எந்த அணியாலும் வாங்கப்படாத சயாலி சத்கரேவுக்கு வாய்ப்பளிக்க வேண்டும் என மந்தனா விரும்பினார். அணியில் இடம்பெறும் வீராங்கனையைத் தேவைக்கேற்ப தொடர்ந்து பயன்படுத்த முடியும் என்பதே அவரது திட்டமாக இருந்தது.
மந்தனாவின் நம்பிக்கையை வீணாக்காத சத்கரே, அந்தத் தொடரில் ஆறு போட்டிகளில் ஒன்பது விக்கெட்டுகளைக் கைப்பற்றினார். அவரது ஓட்டமளிப்பு சராசரி ஓவருக்கு 8.75 ஆக அமைந்தது. இதன் மூலம் பெங்களூரு அணி சம்பியன் பட்டத்தை வெல்லவும் அவர் முக்கிய பங்களிப்பை வழங்கினார்.
அதேபோல், இதுவரை துடுப்பாட்டத்தில் பெரிய அளவில் அடையாளம் காணப்படாத ராதா யாதவின் திறமையையும் மந்தனா சரியாகப் புரிந்துகொண்டார். இடதுகை சுழற்பந்து வீச்சாளராகவும் சிறந்த களத்தடுப்பாளராகவும் அறியப்பட்ட ராதா யாதவால், துடுப்பாட்டத்திலும் சிறப்பாகச் செயல்பட முடியும் என மந்தனா நம்பினார்.
இதற்காக மும்பையில் பயிற்சிக்கான மைதானத்தை ஏற்பாடு செய்து, அதிரடியாக ஓட்டங்களைக் குவிக்கும் திறனை மேம்படுத்துவதற்கான பயிற்சிகளையும் வழங்கினார். அதன் பலனாக, 2026 WPL இறுதிப்போட்டியில் ஐந்து பந்துகளில் ஆட்டமிழக்காமல் 12 ஓட்டங்களை எடுத்த ராதா யாதவ், 204 ஓட்டங்கள் என்ற இலக்கை பெங்களூரு அணி வெற்றிகரமாகத் துரத்துவதற்கு உதவினார். அந்த அணி இரண்டு பந்துகள் மீதமிருக்க வெற்றியைப் பதிவு செய்தது.
உள்நாட்டு கிரிக்கெட்டுக்கு முக்கியத்துவம்!
2023 ஆம் ஆண்டு WPL தொடரின் முதல் சீசனில் பெங்களூரு அணி ஐந்து அணிகளில் நான்காவது இடத்தைப் பிடித்ததுடன், மந்தனாவும் அரைச்சதம் ஒன்றைக்கூட பதிவு செய்யவில்லை.
இதனைத் தொடர்ந்து, உள்ளூர் வீராங்கனைகளின் திறமைகளை நேரடியாக மதிப்பிடுவதற்காக, மகளிர் பிக் பாஷ் லீக் தொடரில் கிடைத்த இலாபகரமான ஒப்பந்தத்தையும் அவர் கைவிட்டார். இந்திய உள்நாட்டு கிரிக்கெட் பருவத்தில் பங்கேற்று, வீராங்கனைகளின் திறமைகளை நேரில் அறிந்துகொள்வதே அவரது நோக்கமாக இருந்தது.
இந்த முடிவு, வெற்றிக்காகத் தேவையான முயற்சிகளை மேற்கொள்ளத் தயாராக இருக்கும் ஒரு தலைவியின் மனப்பான்மையை வெளிப்படுத்தியது. இந்திய அணியின் கேப்டனாகவும் உள்நாட்டு கிரிக்கெட்டில் பெற்ற அனுபவம் அவருக்கு உதவக்கூடும். இருப்பினும், தேசிய அணியில் தேர்வுக்குழுவுடன் இணைந்து செயல்படுவது உள்ளிட்ட புதிய சவால்களையும் அவர் எதிர்கொள்ள வேண்டியிருக்கும்.
இளம் வீராங்கனைகளுக்கு நம்பிக்கையளிக்கும் தலைவி!
மந்தனாவின் மற்றொரு முக்கியமான பலம், வீராங்கனைகளுடன் நெருக்கமான உறவை உருவாக்கி, அவர்களது திறமைகளில் நம்பிக்கை வைப்பதாகும்.
2024 WPL தொடருக்கு முன்னதாக, கர்நாடக மாநில கிரிக்கெட் சங்கத்துடனான சில பிரச்சினைகளால் மாநில அணியில் இடம்பிடிக்க முடியாமல் தவித்த ஷ்ரேயங்கா பாட்டீலுக்கு மந்தனா ஊக்கமளித்தார். பெங்களூரு அணிக்கு அவர் வழங்கக்கூடிய பங்களிப்பை நினைவூட்டி, முக்கிய வீராங்கனையாகச் செயல்படுவதற்கான நம்பிக்கையையும் வழங்கினார்.
அந்தத் தொடரில் ஷ்ரேயங்கா அதிக விக்கெட்டுகளை வீழ்த்திய வீராங்கனைக்கான ஊதா நிறத் தொப்பியை (Purple Cap) வென்றார். பெங்களூரு அணி சம்பியன் பட்டத்தை வென்றதிலும் அவர் முக்கிய பங்காற்றினார்.
அதேபோல், லெக் ஸ்பின்னர் ஆஷா சோபனாவும் WPL தொடரில் விளையாடுவதுடன் தனது இலக்கை நிறுத்திக்கொள்ளாமல், இந்திய அணிக்காக விளையாட வேண்டும் என மந்தனா ஊக்குவித்தார். 2024 WPL தொடரில் 12 விக்கெட்டுகளைக் கைப்பற்றிய சோபனா, அதன் பின்னர் இந்திய அணிக்காக அறிமுகமானார். அவருக்கு இந்திய அணியின் அறிமுகத் தொப்பியை வழங்கியவரும் மந்தனாதான்.
இளம் வீராங்கனையான பிரதிகா ராவலுக்கும் ஒருநாள் போட்டிகளில் மந்தனா ஆதரவளித்தார். அவரது ஓட்டம் குவிக்கும் வேகம் குறித்து விமர்சனங்கள் எழுந்தபோதும், 2025 மகளிர் உலகக் கிண்ணத் தொடரில் பவர் பிளே ஓவர்களில் அதிக ஆபத்துகளை ஏற்று விளையாடிய மந்தனா, பிரதிகா ராவல் தனது ஆட்டத்தில் நிலைபெறுவதற்கு நேரம் வழங்கினார்.
இந்திய T20 அணியில் மாற்றங்களை ஏற்படுத்த வேண்டிய பொறுப்பு!
ஆசியக் கிண்ணம் மற்றும் ஆசிய விளையாட்டுப் போட்டிகள் போன்ற தொடர்களில் இந்தியா வெற்றிகளைப் பெற்றிருந்தாலும், சர்வதேச T20 கிரிக்கெட்டில் சில முக்கிய அணிகளுக்கு எதிராக இந்தியா இன்னும் முன்னேற்றம் காண வேண்டியுள்ளது.
குறிப்பாக, 2020 ஆம் ஆண்டுக்குப் பின்னர் T20 உலகக் கிண்ணங்களில் தென்னாபிரிக்கா, இங்கிலாந்து, நியூசிலாந்து மற்றும் அவுஸ்திரேலியா ஆகிய அணிகளில் எதனையும் இந்தியா வீழ்த்தவில்லை என்ற குறைபாடு சுட்டிக்காட்டப்படுகிறது.
இந்த நிலையை மாற்றுவதில் மந்தனாவுக்கு முக்கியப் பொறுப்பு உள்ளது. பெரிய தொடர்களில் இந்திய அணி எதிர்கொண்டுள்ள முக்கியமான பிரச்சினைகளில் ஒன்று, ஒவ்வொரு வீராங்கனைக்கும் வழங்கப்படும் பொறுப்புகள் தெளிவாக இல்லாததாகும். குறிப்பாக, மூன்றாவது இலக்கத்தில் யார் துடுப்பெடுத்தாட வேண்டும் என்பது போன்ற விடயங்களில் தெளிவான திட்டமிடல் அவசியமாகிறது.
மேலும், முன்னாள் கேப்டனான ஹர்மன்ப்ரீத் கவுர் அணியில் தொடர்ந்து முக்கிய பங்காற்றுவதற்கான சூழலை உருவாக்குவதும் மந்தனாவுக்கு மற்றொரு சவாலாக இருக்கும். கேப்டன் பொறுப்பிலிருந்து விலகிய பின்னரும் அணியில் சிறப்பாகச் செயல்படுவதற்கு அவருக்கு ஆதரவான அணிச் சூழல் அவசியமாகும்.
எதிர்காலப் பெரிய சவால்களுக்கு தயாராகும் இந்திய அணி!
ஜிம்பாப்வே அணிக்கு எதிரான தொடர், மந்தனாவின் தலைமைத்துவப் பயணத்திற்கு நல்ல தொடக்கமாக அமையலாம். இருப்பினும், அடுத்த ஆண்டு நடைபெறவுள்ள சம்பியன்ஸ் டிராபி, 2028 T20 உலகக் கிண்ணம் மற்றும் லொஸ் ஏஞ்சல்ஸ் ஒலிம்பிக் போட்டிகள் போன்ற பெரிய சவால்களை இந்திய அணி எதிர்கொள்ளவுள்ளது.
2025 உலகக் கிண்ணத்திற்கு முன்னதாக தனது உடற்தகுதியில் மந்தனா மேற்கொண்ட மாற்றங்களைப் போலவே, தொடர்ந்து தன்னை மேம்படுத்திக்கொள்ளும் அவரது அணுகுமுறையும், திட்டமிட்ட தயாரிப்புகளும் எதிர்காலத்தில் முக்கியத்துவம் பெறும்.
துடுப்பாட்டத்தில் ஏற்கெனவே நிரூபித்த திறமை, இளம் வீராங்கனைகளுக்கு ஆதரவளிக்கும் பண்பு, உள்நாட்டு கிரிக்கெட் குறித்த ஆழமான புரிதல் ஆகியவற்றுடன் இந்திய அணியை வழிநடத்தத் தயாராகியுள்ள ஸ்மிருதி மந்தனா, புதிய கேப்டனாக மட்டுமல்லாமல், இந்திய மகளிர் கிரிக்கெட்டின் அடுத்த கட்ட வளர்ச்சிக்கு முக்கியமான தலைவியாகவும் பார்க்கப்படுகிறார்.












Comments (0)
Be the first to share your thoughts.