இலங்கையில் எச்.ஐ.வி (HIV) தொற்று பரவல் அதிகரித்து வருவதற்கான முக்கிய காரணமாக, ஆண்களுக்கிடையில் நடைபெறும் பாதுகாப்பற்ற உடலுறவு அமைந்துள்ளதாக பாலியல் நோய்கள் தொடர்பான விசேட வைத்திய நிபுணர் நிமாலி ஜயசூரிய தெரிவித்துள்ளார்.
சுகாதாரம் மற்றும் ஊடக அமைச்சின் கேட்போர் கூட மண்டபத்தில் நடைபெற்ற விசேட ஊடகவியலாளர் சந்திப்பில் கலந்துகொண்டு கருத்து தெரிவிக்கும்போதே அவர் இந்த அதிர்ச்சித் தகவலை வெளியிட்டார்.
தற்போது எச்.ஐ.வி தொற்றாளராக ஒரு பெண் அடையாளங்காணப்படும் போது, ஏழு ஆண்கள் தொற்றாளர்களாக அடையாளம் காணப்படுவதாக அவர் சுட்டிக்காட்டுகிறார்.
இலங்கையில் ஆண்களுடன் உடலுறவு கொள்ளும் ஆண்களிடையேயே (MSM) எச்.ஐ.வி தொற்று அதிகமாகப் பதிவாவதாக இலங்கை பாலியல் சுகாதாரம் மற்றும் எச்.ஐ.வி மருத்துவத் துறை விசேட வைத்திய நிபுணர்கள் கல்லூரியின் (SLCoSHH) தலைவியான விசேட வைத்திய நிபுணர் நிமாலி ஜயசூரிய கவலை வெளியிட்டுள்ளார்.
பாதுகாப்பற்ற உடலுறவைத் தாண்டி, போதைப்பொருட்களை ஊசி மூலம் நரம்புகளுக்குச் செலுத்துவதனாலும் எச்.ஐ.வி தொற்று பதிவாவதாக அவர் குறிப்பிட்டுள்ளார். நோய் பரவலில் இது தற்போது அவதானம் செலுத்தப்பட வேண்டிய மிக ஆபத்தான நிலைமையாகும் எனவும் அவர் எச்சரித்துள்ளார்.
பாலியல் சுகாதாரம் மற்றும் எச்.ஐ.வி மருத்துவத் துறையின் தற்போதைய போக்குகள், நோய் தடுப்பு முறைகள் மற்றும் எதிர்கால புதிய கண்டுபிடிப்புகள் குறித்து பொதுமக்களுக்கும் ஊடகங்களுக்கும் விழிப்புணர்வு ஏற்படுத்தும் நோக்கிலேயே இந்த விசேட சந்திப்பு ஏற்பாடு செய்யப்பட்டிருந்தது குறிப்பிடத்தக்கது.












Comments (0)
Be the first to share your thoughts.